耶馬同「網紅姐姐」度假　女方即收死亡恐嚇

西班牙天之驕子拉明耶馬，上年歐國盃決賽後同女友分手，但只得17歲嘅佢感情生活多姿多采，最近被揭發同大佢差唔多13年嘅「網紅」Fati Vazquez一齊度假，女方隨即收到球迷死亡恐嚇，耶馬亦即時澄清兩人並冇拍拖。

西班牙傳媒爆料，耶馬同Fati早前一齊去意大利度假，最初係球迷發現佢哋嘅IG不約而同有「同時同地」嘅「獨照」出現，顯示兩人可能秘密拍拖，之後八卦雜誌《 Lecturas》更影到佢哋攬住玩水上電單車，非常親密。

30歲嘅Fati係成人網站OnlyFans嘅著名模特兒，佢同耶馬疑似「姐弟戀」曝光後，即被大批球迷詛咒，Fati亦喺社交網反擊：「好遺憾見到有啲人內心咁黑暗，詛咒一個唔識嘅人去死。我會選擇有宗旨、充滿陽光咁生活，如果有人想我病，我會想佢康復，因為冇一個正常人會希望其他人被摧毀。」

據報，西班牙花邊新聞專家Javi de Hoyos曾經聯絡耶馬，該巴塞隆拿新星已否認同Fati拍拖。