【有片】美斯轟神奇罰球 國際邁亞密反勝波圖
周五(20日)凌晨世冠盃A組賽事，「球王」美斯再顯神通，呢位37歲老將喺下半場轟入精彩罰球，帶領國際邁亞密2比1反勝波圖，成為首支喺國際賽擊敗歐洲球會嘅美職球隊。美斯歷來世冠盃累積6個入球，距離C朗拿度嘅紀錄只差1球。
國際邁亞密首仗只同艾阿里悶和0比0，今場對波圖8分鐘就輸12碼，奧摩洛迪安操刀射入。國際邁亞密換邊後大反撲，47分鐘即由堤拿斯高施高維亞接應傳中抽入追平，7分鐘後佢哋喺娥眉月頂博到罰球，美斯展現百步穿揚妙技轟入，帶領球隊反敗為勝。
美斯罰球入波(球證鏡頭)：https://twitter.com/i/status/1935796174717419537
美斯射入職業生涯第68個罰球入波，歷史上排名第3位，僅次於比利(70球)同祖連奴比南布肯奴(77球)，而美斯喺世冠盃累積6個入球，亦追平賓施馬、加里夫巴利並列次席，僅以1球落後紀錄保持者C朗(7球)，國際邁亞密下輪對彭美拉斯有望創造紀錄。
美斯賽後表示：「成隊波付出巨大努力，拎到呢場好重要嘅勝仗，值得好好享受。你見到我哋競爭嘅決心，今場面對一支好強嘅歐洲球隊，我哋知道實力唔及對方，但我哋都有自己嘅強項，依家我非常開心。」