艾摩廉下「禁飛令」　4球星冇份美國集訓

曼聯領隊魯賓艾摩廉上季中臨危受命上任，今個暑假終於有機會打造自己嘅陣容，據報佢決定用鐵腕治軍，已下令拉舒福特、阿歷真度加拿祖、安東尼馬菲奧斯同查頓辛祖4位球星盡快轉會，如果佢哋下個月仲未搵到出路，亦唔會隨大軍飛去美國進行季前集訓，正式「割席」。

據英國《太陽報》報道，艾摩廉希望喺今夏樹立自己嘅權威，唔係同佢坐「同一條船」嘅球員會被踢走，消息人士透露：「艾摩廉上季喺季中先嚟，依家終於有機會打造自己班底，佢唔想浪費時間。艾寧摩寧願管理一個較細規模陣容，增加球員間嘅團結性，確保所有球員都有足夠上陣時間，有需要嗰陣可以以最好狀態落場比賽，其他『閒人』寧願擺埋一邊，冇眼屎乾淨盲。」

曼聯下月19日會先去瑞典踢一場熱身賽，之後就會飛去美國集訓，目標係喺集訓前完成主要收購，除咗已經簽入嘅馬菲奧斯根夏之外，仲想再簽翼鋒(麥比奧莫)同前鋒(約基利斯)，最好就係賣走晒拉舒福特、阿歷真度加拿祖、安東尼馬菲奧斯同查頓辛祖4星，就算佢哋「滯留」亦會被禁止同大隊飛去美國。