曼聯又睇中拜仁兵　想借祖奧包連夏

曼聯今夏積極收購前鋒之外，亦有意簽入中場，根據英國媒體《GIVEMESPORT》爆料，紅魔鬼睇中拜仁慕尼黑中場祖奧包連夏，希望借用呢位29歲葡萄牙國腳1季。

據悉曼聯原本頭號目標係阿特蘭大中場艾達臣荷西，但呢位巴西國腳身價達6,000萬歐元(約5.4億港元)，令紅魔鬼卻步，惟有轉移目標斟祖奧包連夏。

祖奧包連夏出身於士砵亭，2016至22年效力呢支葡超勁旅期間，曾經同當時主帥魯賓艾摩廉合作過，艾摩廉現時成為曼聯領隊，想搵番呢位昔日麾下猛將幫手。加上祖奧包連夏曾於2022至24年效力富咸，擁有英超經驗，唔需要花時間適應，亦係曼聯睇中佢嘅主因之一。

祖奧包連夏上年夏天以5,100萬歐元(約4.6億港元)由富咸轉投拜仁，但不獲重用，僅於德甲上陣17次，有可能將佢外借去曼聯。事實上，兩間球會近年有唔少交易，曼聯2年前曾向拜仁借用中場沙比薩，上年夏天更收購2位拜仁後衞馬菲斯迪歷特、馬沙拉奧，祖奧包連夏隨時都會成「魔」。