【有片】上陣4分鐘食紅牌 積遜「黑腳」累車路士輸波
去片睇尼高拉斯積遜粗野踩踏對手
周六(21日)凌晨世冠盃D組，英超豪門車路士上半場領先，但換邊後連失3球，以1比3不敵法林明高。車路士前鋒尼高拉斯積遜後備上陣僅4分鐘，就因為粗野踩踏對手，被球證直接出示紅牌趕出場，成為輸波罪人。
車路士原本有好開始，上半場13分鐘由柏度尼圖單刀射入打開紀錄，但下半場出現大逆轉，法林明高憑般奴漢歷基賓圖近門射入扳平，僅過3分鐘，呢支巴西勁旅利用角球攻勢，由33歲老將後衞丹尼路雷斯射入反超前2比1。
車路士防線迅速崩潰之下，愈踢愈亂，68分鐘前鋒尼高拉斯積遜搶波時，使出「收山腳」踩向法林明高後衞艾爾頓盧卡斯腳掌，球證毫不猶豫，向呢位塞內加爾國腳出示紅牌。車仔領隊馬利卡斯原本換入尼高拉斯積遜，打算增強攻力，反而踢少1人，最終再失1球，輸1比3，兩戰取得1勝1負，至於法林明高2戰2勝。
比賽當日係尼高拉斯積遜24歲生日，估唔到收到紅牌做「禮物」，賽後佢公開向球隊道歉，主帥馬利卡斯拒絕評論，似乎內心非常不滿呢位前鋒表現。尼高拉斯積遜上月英超對紐卡素，亦因為向對手「批肘」，被球證直接紅牌驅逐出場，睇來佢仲未吸取教訓，又魯莽見「紅」。