法比加斯出手　科木想簽安東尼

曼聯計劃今夏出售翼鋒安東尼馬菲奧斯，根據「轉會權威」記者羅曼諾(Fabrizio Romano)最新爆料，由西班牙名宿法比加斯執教嘅意甲球隊科木想簽入呢位25歲巴西國腳，成為佢脫「魔」新出路。

安東尼馬菲奧斯今年1月底被外借去貝迪斯之後，表現脫胎換骨，上陣26場入9球及5次助攻，但呢支西甲球隊未能獲得下屆歐聯入場券，缺乏資金買斷佢。雖然貝迪斯希望再次借用安東尼，問題係紅魔鬼傾向直接出售佢，令交易陷入僵局。

科木想乘虛而入「截胡」簽安東尼馬菲奧斯，呢支「神奇球隊」上年夏天升上意甲後，頻頻簽入不少具知名度球員，包括前曼聯中堅華拉尼，可惜佢因傷退役，法比加斯今次又打曼聯球員主意，睇中安東尼馬菲奧斯。

不過，曼聯要求起碼4,000萬鎊(約4.2億港元)轉會費，科木有冇足夠財力收購安東尼馬菲奧斯，實屬疑問。