PSG力斟般茅中堅　即將成事

巴黎聖日耳門(PSG)參加世冠盃期間繼續增兵，據報即將斟掂般尼茅夫22歲烏克蘭中堅薩巴尼爾，願意出價6,000萬歐元(約5.4億港元)高價，等待般茅答覆就可以拍板。

般尼茅夫今季英超排第9，成績算係不過不失，亦冇得打歐洲賽，但佢哋嘅4人防線，就有3人被大球會睇中，包括已轉投皇家馬德里，依家踢緊世冠盃嘅中堅甸恩胡積臣，仲有被英超冠軍利物浦睇中嘅左閘米路斯卻基斯，薩巴尼爾亦獲歐洲「三冠王」巴黎聖日耳門垂青，可以話個個都飛黃騰達。

薩巴尼爾對於轉投PSG態度積極，佢希望足球事業更上一層樓，所以對於今次交易都好重視，至於般尼茅夫，在接連出售甸恩胡積臣同米路斯卻基斯之後，對於薩巴尼爾轉會談判暫未鬆口，不過PSG叫價去到6,000萬歐元，誠意十足，成事機會唔低。