真係去巴塞？拉舒福特：好想同耶馬踢波

曼聯前鋒拉舒福特前途問題一直備受關注，呢位27歲英格蘭國腳近日接受訪問時，大讚巴塞隆拿新星拉明耶馬，表明非常渴望同對方一齊踢波，仲話西班牙係好地方，似乎已下定決心轉投巴塞隆拿。

由於曾傳出巴塞隆拿有意簽入拉舒福特，「福仔」被問到想唔想同拉明耶馬合作，佢話：「當然想啦，我非常渴望同耶馬一齊踢波，好難用言語形容佢嘅表現，佢先至17歲，已經做到不可思議嘅事，如果要揀選世界最佳球員，我揀耶馬，每個人都希望同最好嘅球員合作，所以大家拭目以待。」

拉舒福特擅長踢左翼，佢認為自己亦勝任中鋒，就好似曾經效力阿仙奴同巴塞隆拿嘅亨利一樣，似乎暗示加盟巴塞，並唔會同拉明耶馬出現位置重疊問題。

另外，拉舒福特亦嚮往去西班牙生活：「西班牙係一個美麗地方，由英國飛過去只係3小時，當地氣候非常好。」可見佢已準備好去西甲搵食，甚至傳出「福仔」為轉投巴塞隆拿，願意減人工，但曼聯要求4,000萬鎊(約4.2億港元)轉會費，可能成為交易障礙。