利物浦、阿仙奴力斟　馬克古希選擇係咁？

水晶宮中堅馬克古希已成英格蘭國家隊主力，佢同球會嘅合約明年完結，據報利物浦、阿仙奴都有意出手搶人，不過英國《每日郵報》報道，呢位24歲球星將拒絕轉會，選擇等到明年以自由身走人。

阿仙奴今夏希望簽入新中堅，作為威廉沙列巴同加比爾馬加希斯替補；利物浦即將賣走查洛爾昆沙，同樣要搵人頂替，「雙紅」目標直指即將約滿嘅馬克古希，水晶宮為免人財兩失，預料會「割價」到4,000萬鎊有交易。

不過《每日郵報》消息指，馬克古希知道去阿仙奴或利物浦都唔會係必然正選，佢唔想喺「世盃年」淪為後備，影響佢入選國家隊嘅機會，所以屬意繼續留喺水晶宮，等到明年自由身轉會，獲取更豐厚嘅合約。