根度簡轉戰土超？哥迪奧拿咁回應

繼奇雲迪布尼離隊之後，曼城另1位中場老將根度簡亦可能走人，轉投土耳其勁旅加拉塔沙雷，「藍月亮」領隊哥迪奧拿雖然話想留用根度簡，但同時承認隊內有人滿之患，態度模稜兩可之下，應會交由根度簡自行決定是否轉會。

對於根度簡可能離隊一事，哥迪奧拿話唔知情：「我完全唔知道呢件事，隊內現時有太多球員，但根度簡仲係我計劃一部分。」曼城早前簽入2位中場卓基、雷恩達斯之後，已年屆34歲嘅根度簡新一季上陣時間可能大減，加拉塔沙雷趁機邀請呢位擁有土耳其血統嘅前德國國腳加盟。

根度簡2016年由多蒙特加盟曼城，兩年前曾轉投巴塞隆拿，但僅過1季就重返曼城，現時只剩下1年合約。由於「藍月亮」上季成績大倒退，哥迪奧拿希望將球隊年輕化，老將根度簡第2次出「城」並唔令人意外。