曼城炒6比0「唔夠數」　下場鬥祖記非勝不可

周一(23日)朝早世冠盃G組賽事，英超勁旅曼城以6比0大勝艾阿恩，提前鎖定出線資格。不過曼城對呢場大勝就唔係咁滿意，事關佢哋仲差1球先可以喺得失球超越祖雲達斯，最後一輪雙雄正面交鋒，曼城要贏波先可以搶到首名，避免16強可能硬撼皇家馬德里。

曼城首仗2比0輕取韋達卡薩白蘭卡，今場對住弱旅艾阿恩大開殺戒，上半場由根度簡、卡迪奧艾捷維利同艾寧夏蘭特入12碼領先3球，73分鐘根度簡攻入個人第2球，加上奧斯卡波比同卓基尾段入波，湊成6比0大勝。當卓基喺89分鐘射成6比0後，曼城球員都第1時間衝番去中場再開波，因為佢哋知道只要入多1球，最後一輪對祖雲達斯唔輸就可以首名出線，可惜最終事與願違。

祖雲達斯喺較早時間，4比1大勝韋達卡薩白蘭卡，目前同曼城一樣有6分，而且得失球差都係+8，不過祖雲達斯入球數字(9球)多曼城1球，所以下輪兩隊交手如果打和，祖雲達斯就會以較多入球首名出線。要知道G組次名出線球隊，喺16強會對H組首名，普遍預期會係皇家馬德里會，所以曼城如果想避開勁敵，最後一輪對祖雲達斯係非勝不可。