利物浦考慮簽奧森漢　2將或做交換籌碼

英超盟主利物浦今個暑假大展拳腳，日前宣布以破英超轉會費紀錄收購科利安華迪斯後，據報仲想再買多個前鋒，尼日利亞前鋒域陀奧森漢最近成為目標之一，利物浦更考慮用達雲紐尼斯同費達歷高基艾沙，作為交換籌碼之一。

域陀奧森漢上季被外借去加拉塔沙雷，不過佢仍然係拿玻里嘅球員，眾所周知拿玻里一定會將佢賣走，而呢支意甲冠軍亦打緊達雲紐尼斯同費達歷高基艾沙嘅主意。據意大利媒體《Tutto Mercato Web 》報道，利物浦可能會因利成便，同拿玻里洽談球員交換。

報道指利物浦收購前鋒計劃，首選係紐卡素嘅阿歷山大伊沙克，但1.5億鎊轉會費令「紅軍」猶豫；次選係法蘭克福嘅伊基迪基，但佢未完全證明自己實力下，6,000萬鎊以上轉會費同樣價值不菲。26歲嘅域奧森漢近3季聯賽有2季入超過20球，拿玻里急於賣人之餘，仲有機會用球員做交換，性價比極高，利物浦正密切考慮推動呢次收購。