傳奇7號大晒？美臣蒙特獲留用

曼聯準備今夏「大清洗」出售多位邊緣球員，原本盛傳「玻璃腳」美臣蒙特將會被賣走，但根據「轉會權威」記者羅曼諾(Fabrizio Romano)爆料，呢位26歲英格蘭中場冇打算離隊，並會集中精神參加季前備戰，希望操起狀態迎接新球季。

美臣蒙特2年前由車路士轉投曼聯之後，經常受傷缺陣，成「魔」兩季合共僅上陣46次，入4球及1次助攻，被網民嘲諷為最冇存在感嘅曼聯「傳奇7號」。不過，美臣蒙特仲有3年合約，加上佢現時身價最多只值2,500萬鎊，比紅魔鬼買入價少超過一半，會方唔想賤賣佢，惟有繼續留用，希望美臣蒙特下季能夠翻生。

事實上，魯賓艾摩廉上年11月成為曼聯主帥之後，已經有意將美臣蒙特打造為球隊核心人物，只要佢冇病冇痛，應該會獲得重用。