閃耀U21歐國盃　史特加拒賣「2米美斯」

德國前鋒禾達美迪喺今屆U21歐國盃光芒四射，踢3場比賽就有5入波加3次助攻，表現達「屈機」程度。據報禾達美迪受到國際米蘭、拜仁慕尼黑、車路士等豪門垂青，不過史特加就拒絕賣走呢位「2米美斯」，仲準備用兩倍人工同佢續約。

23歲嘅禾達美迪上季喺德甲已經嶄露頭角，今屆U21歐國盃更加上晒位，擁有1米98身高嘅佢，同時有細膩腳法同技術，史特加隊長艾特加卡拉沙早前就形容：「佢控球技術好好，同時又可以好似一個1米6嘅球員咁扭波，呢個人有成2米高，但技術就細膩到好似美斯咁樣！」

據報國際米蘭等豪門對佢好有興趣，不過據德國《踢球者》報道，史特加唔打算今個夏天放人，而且更準備向佢開出新合約，將佢目前150萬歐元年薪加多一倍。史特加總監禾祖梅夫表示：「外界講到禾達美迪好似有機會轉會，但我哋好冷靜，球會同佢已經有堅定嘅未來規劃。」