曼聯第2次報價　麥比奧莫願入魔

曼聯斟介賓福特翼鋒麥比奧莫有進展，據報曼聯向賓福特開出第2份報價，金額為6,000萬鎊(約6.3億港元)，麥比奧莫本人傾向加盟曼聯，睇嚟好事近。

英國傳媒報道，曼聯本月初向賓福特開出首份報價，轉會費總值5,500萬鎊，遭賓福特拒絕，期間又有熱刺介入，由賓福特轉投熱刺嘅新帥法蘭克，有意召喚麥比奧莫一齊過檔，令曼聯增兵計劃一度暫緩。

麥比奧莫決定去向期間，其喀麥隆隊友門將奧拿拿從旁游說，加上麥比奧莫有親人是紅魔球迷，令該位25歲翼鋒最終決定揀選曼聯為生涯下一站，曼聯向佢開出個人條件為至少周薪15萬鎊。

不過曼聯第2份報價6,000萬鎊，仍然未能滿足賓福特，「小蜜蜂」目標價係6,500萬鎊，心理底線係要至少要同近日加盟曼聯嘅馬菲奧斯根夏睇齊，亦即6,250萬鎊，曼聯只要再輕微加碼，就可成事。