新兵利安戴納開齋　車路士大勝出線

周三(25日)早上世冠盃D組最後一輪賽事，車路士大勝艾斯柏蘭斯3比0，獲得次名出線席位，將於16強對賓菲加。車路士新簽前鋒利安戴納第3次上陣，終於開齋入波，正好趁尼高拉斯積遜停賽2場，爭取上位。

車路士今場和波都可以出線，但仍然全力爭勝，創造大量攻勢，結果踢到上半場補時連入2球，安素費南迪斯開出罰球，由中堅艾達拉比奧約頂入打開紀錄。

轉個頭，安素費南迪斯再次送出助攻，由利安戴納射成2比0，呢位22歲英格蘭新星6月初以3,000萬鎊(約3.2億港元)轉會費，由葉士域治加盟車仔，今仗頂替停賽嘅尼高拉斯積遜，擔任正選交足功課，相信可以博取到主帥馬利斯卡歡心。

換邊之後，車路士繼續控制大局，戰至補時，19歲小將泰利基佐治亦建一功，贈對手3蛋。另外，尼高拉斯積遜上場對法林明高，粗野踩踏對手，被球證出示紅牌趕出場後，國際足協宣布判罰佢停賽2場，除咗缺陣今場對艾斯柏蘭斯之外，亦無緣16強對賓菲加，意味利安戴納下場可以繼續擔正。

同組另1場，前賽已穩奪首名出線嘅法林明高有所留力之下，逼和FC洛杉磯1比1。