財政違規　里昂遭重罰降落法乙

法甲球隊里昂因為財政違規，正式被法國職業足球聯盟重罰降班，里昂將提出上訴，如果上訴失敗，唔只降落法乙，仲失去下屆歐霸盃資格，令原本因為「多重球會擁有條例」失去歐霸盃入場券嘅同集團球會水晶宮可以參賽。

里昂今季獲得聯賽第6位，取得下屆歐霸盃資格，但球會近年陷入財困，上年已因為1.75億歐元(約16億港元)債務問題，處於被罰降班邊緣，即使其後出售多位球員籌集資金還債，但只係「吊鹽水」。

法國職業足球聯盟旗下財政監管機構DNCG現時正式宣布里昂財政違規，判罰降班。里昂需於7日內提出上訴，法國媒體《RMC》指會方已決定上訴。如果里昂上訴失敗，下季就要踢法乙，原本排法甲尾三降班嘅蘭斯可以保留法甲席位。

此外，里昂大股東美國商人泰斯達同時係英超球會水晶宮班主，根據歐洲足協「多重球會擁有條例」，兩間有相同擁有者嘅球會，唔可以參加同一賽事。英足盃得主水晶宮因為聯賽排名較低，被逼「讓路」畀里昂，但如果里昂最終降班，水晶宮嘅歐霸盃入場券可以失而復得。