普巴將同摩納哥簽2年　下季有得踢歐聯

摩納哥成為「失意軍人」落腳地，根據「轉會權威」記者羅曼諾(Fabrizio Romano)爆料，呢支法甲季軍即將簽入保羅普巴及安素法迪。普巴因為服食禁藥一事，已經接近2年冇波踢，估唔到呢位32歲法國球星重返賽場，下季立即有機會再戰歐聯。

據悉保羅普巴已經同摩納哥方面達成口頭協議，雙方將會簽約2年，等律師完成文件手續約後，呢位中場將於周末飛到摩納哥接受體測。保羅普巴喺2023年8月意甲為祖雲達斯上陣對烏甸尼斯，賽後佢被驗出使用興奮劑，一度遭重判停賽4年，上訴後獲減刑至停賽18個月，已於今年3月刑滿。不過，祖記上年11月決定提早同普巴解約，佢近期喺美國邁阿密獨自操練。

另外，巴塞隆拿前鋒安素法迪將於周五(27日)前往摩納哥體測，雙方都希望盡快完成轉會交易。