半賣半送！阿仙奴「超筍價」簽洛加特

阿仙奴嘅夏天組軍計劃開始行動，據報周四(26日)同賓福特達成協議，用「超筍價」930萬鎊收購佢哋隊長基斯甸洛加特，呢位丹麥中場亦已同意個人條件，完成體測後就會正式簽約。

據羅曼諾同Ornstein等權威記者報道，隨住同湯馬士柏迪續約告吹後，阿仙奴即鎖定收購洛加特，轉會費為930萬鎊，另有獎金條款最高增至1,500萬鎊，遠遠低於早前熱刺傳聞4,500萬鎊嘅收購價。

阿仙奴夏天有湯馬士柏迪同佐真奴費路兩大中場約滿離隊，據報球隊已簽入西班牙中場蘇比文迪取代柏迪打正選，預料洛加特會代替佐真奴嘅副選位置。

洛加特效力賓福特5年，以防守力強見稱，上季112次重奪球權，喺英超僅次於摩西斯卡些度。消息指阿迪達欽點收購洛加特，希望佢可以成為球隊更衣室領袖之一，31歲嘅洛加特如順利加盟，將佢隊中僅有2名超過30歲球員。