艾利洛勢離「紅軍」擔大旗　白禮頓搶人

英格蘭新星哈維艾利洛16歲就喺英超上陣，依家22歲嘅佢今年隨利物浦首嘗英超冠軍滋味，不過佢喺施洛執教下未受重用，隨住科利安華迪斯加盟，哈維艾利洛下季上陣機會肯定更少，U21歐國盃後勢離開利物浦獨挑大樑，據報白禮頓將開價4,000萬鎊搶人。

艾利洛上季英超只踢過2次正選，不過後備上陣屢有佳作，包括歐聯1比0射爆巴黎聖日耳門。隨住利物浦用破轉會費紀錄收購科利安華迪斯，艾利洛喺隊中更加冇碇企，今屆U21歐國盃佢已證明自己可以擔大旗，消息指白禮頓對佢志在必得，4,000萬鎊轉會費有望令利物浦放人。

前英格蘭國腳迪科爾亦鼓勵艾洛特轉會：「好多球會都關注U21歐國盃，之前已經講過，艾洛特嘅實力唔應該一直坐冷板，佢已經喺U21歐國盃證明自己，4強戰呢兩個入波顯示佢係頂級球員，佢依家要做嘅就係去一間畀佢發揮同擔大旗嘅球會。」