16強出爐！皇馬首名出線入地獄賽區

世冠盃16強全部誕生！皇家馬德里周五(27日)朝早3比0大炒薩爾斯堡，喺H組順利取得首名資格，不過佢哋冠軍之路唔易行，16強就要硬撼意甲嘅祖雲達斯，8強有機會面對多蒙特，4強好可能鬥巴黎聖日耳門或拜仁慕尼黑，場場硬仗！

皇馬今場有基利安麥巴比繼續缺陣，不過雲尼斯奧斯祖利亞表現神勇，40分鐘快速反擊推到禁區頂勁射入網，完半場前佢表演精彩後肘，助攻畀費達歷高華維迪射成2比0。皇馬下半場放慢節奏，84分鐘由小將干沙路加西亞錦上添花，3比0大勝而回。

首名出線嘅皇馬雖然進入「地獄賽區」，但雲尼斯奧斯祖利亞賽後表示：「我哋感覺好好，依家要好好休息迎接淘汰賽，皇馬唔可以輸，球員逐步適應沙比阿朗素嘅戰術，依家去到最重要嘅時刻，我哋一定要贏世冠盃冠軍。」

同組希拉爾2比0擊敗帕丘卡，以小組次名身份晉級，呢支沙特豪門亦成為16強入面唯一嘅亞洲代表，佢哋將會同英超勁旅曼城爭入8強。