玩晒！拜仁盡收兵器　傾掂德國U21鋒霸

德甲班霸拜仁慕尼黑繼續盡收天下兵器，喺今屆U21歐國盃光芒四射嘅前鋒禾達美迪，據報已同拜仁達成轉會協議，依家只等拜仁同史特加傾掂轉會費，23歲嘅禾達美迪就會成為拜仁一員，做「哈利卡尼接班人」。

禾達美迪上季喺德甲大爆發，依家舉行嘅U21歐國盃，呢位身高近2米嘅前鋒踢4場入6球，帶領德國U21殺入決賽，自然成為球壇搶手貨。財大氣粗嘅拜仁就先下手為強，成功同禾達美迪傾掂轉會，權威記者羅曼諾證實：「拜仁同禾達美迪達成基本協議，今個星期同經理人見面後，傾好一張到2030年6月嘅合約，轉會等待同史特加嘅洽商。」

據德國《圖片報》報道，史特加預期轉會費約6,000萬歐元，拜仁主管艾保爾日前一度離開美國嘅世冠盃大營，傳聞就係飛返德國落實呢單轉會，消息指艾保爾周三(25日)已飛返美國，似乎成竹在胸。拜仁前鋒哈利卡尼已經31歲，球會希望禾達美迪可以成為該英格蘭射手嘅接班人。