50歲碧咸入院　根除22年前舊患

正當國際邁亞密打入世冠盃16強，準備火併巴黎聖日耳門之際，佢哋班主碧咸傳出住院消息，公布碧咸入院之人正係佢老婆維多利亞，今次入院係要根除22年前嘅手腕舊患。

英國傳媒報道，碧咸喺22年前一場對南非嘅熱身賽期間手腕受傷，受傷部位要打石膏同鑲螺絲，但係該口螺絲腳未能在體內溶解留下舊患，今次手術就係移除病根，已經順利完成，維多利亞幫出帖報平安。

手術後，維多利亞發帖並留言：「爸爸早日康復」，另一張相係碧咸帶上腕帶，寫住「早日康復」。

碧咸既係國際邁亞密班主，生涯晚期亦喺巴黎聖日耳門掛靴，不過今次兩隊喺世冠盃16強大戰，只能喺病床上觀戰。