投注自己拎黃牌　烏甸門將面臨停賽4年

意甲又爆出球員違規賭波醜聞，根據意大利《米蘭體育報》報道，烏甸尼斯門將奧基爾涉嫌投注買自己喺比賽中拎黃牌，遭到意大利足總檢控，面臨被重罰停賽4年。

意大利足總檢察院調查2024年3月11日意甲拉素主場對烏甸尼斯，發現異常投注，有人重金買門將奧基爾拎黃牌，賠率為9倍，成功贏咗12萬歐元(約110萬港元)，該仗奧基爾擔任正選，成為調查目標。

據悉賽前奧基爾同3位朋友合謀，投注自己拎黃牌，佢踢到64分鐘因為故意拖延時間，被球證出示黃牌警告，烏甸尼斯最後贏2比1。檢察院認為當時仲有唔少比賽時間，但奧基爾卻拖延時間，明顯想「申請」拎黃牌，行為非常可疑，加上綜合其他證據，向佢提出檢控，如果罪成，將面臨停賽4年。

現年25歲嘅奧基爾喺德國出世，爸爸係尼日利亞人，佢選擇代表尼日利亞國家隊，2023年由屈福特加盟烏甸尼斯，總共上陣48場。