利萊辛尼上演告別戰　球迷：小心佢又搞破壞

拜仁慕尼黑翼鋒利萊辛尼將於7月1日正式加盟土耳其勁旅加拉塔沙雷，世冠盃16強成為佢嘅告別戰，但呢位29歲德國國腳上場分組賽多次失機，成為球隊輸波，跌落淘汰賽「地獄賽區」罪人，唔少拜仁球迷呼籲教練高柏尼唔好再派呢位「反骨仔」上陣，以免誤大事。

拜仁慕尼黑上場對賓菲加，利萊辛尼踢足全場，有5次射門及2次單刀都失之交臂，原本和波可以首名出線，結果輸0比1，只能以次名出線，進入淘汰賽後，面臨遇上2大勁敵巴黎聖日耳門、皇馬，拜仁球迷將球隊陷入困境歸咎於辛尼離隊前「搞破壞」。

利萊辛尼早前落實今夏約滿離隊，拜仁會方亦講明佢只會效力至6月30日，意味美國時間6月29日舉行嘅世冠盃16強對法林明高，將會係辛尼最後1次為拜仁披甲，但經過上場災難性表現後，佢仲可唔可以踢今場告別戰，成為疑問。