國米20歲「新韋利」連場救駕　新一季獲留用

國際米蘭參加今屆世冠盃，新教練捷禾大膽重用2位新星「艾斯普薛圖兄弟」，尤其是剛於周六(28日)20歲生日嘅法蘭斯高艾斯普薛圖演出非常搶鏡，近2場分別貢獻助攻及入波，成為球隊出線16強功臣，獲網民封為「新韋利」，新一季將獲留用。

艾斯普薛圖一門三傑，3兄弟都係球員，24歲大哥沙華托尼效力意乙球隊史柏斯亞，22歲二哥施巴斯坦、20歲三弟法蘭斯高踢緊國米，一齊出戰世冠盃。

施巴斯坦首2場都擔任正選，上仗輪到法蘭斯高擔正，佢不負所托，射入打開紀錄1球，亦係國米生涯首個入波，協助球隊以2比0擊敗河床。對浦和紅鑽一役，法蘭斯高補時貢獻助攻，險勝2比1，國米可以打入16強，法蘭斯高功不可沒。

身高1米91嘅法蘭斯高身型高大，把握力強，被指有國米傳奇射手韋利影子，今年4月續約至2030年。拿玻里曾提出以3,000萬歐元(約2.8億港元)收購佢，但被國米拒絕，可見會方視佢為未來鋒線支柱。