C朗恩准　艾納斯請70歲葡國老帥執教

艾納斯教練皮奧利早前黯然離隊之後，呢支沙特阿拉伯豪門搵到新帥接手領軍，根據「轉會權威」記者羅曼諾(Fabrizio Romano)爆料，70歲葡萄牙名帥佐治捷西斯已同意執教艾納斯，巨星C朗亦「恩准」呢位同胞加盟，下季同聲同氣爭標。

據悉C朗之所以贊成聘請佐治捷西斯執教，皆因兩人都係「士砵亭人」，呢位老帥嘅球員及教練生涯都效力過呢支葡超勁旅。佐治捷西斯教波成績亦非常輝煌，最威水係協助葡賓菲加奪得3次葡超及5次葡聯盃等多項冠軍。

佐治捷西斯近年去沙特搵食，曾兩度執教希拉爾，並領軍奪得2023/24年球季聯賽及國王盃雙料冠軍，但希拉爾今季聯賽屈居亞軍，佐治捷西斯被炒。相信艾納斯及C朗睇中佐治捷西斯喺沙特有捧盃往績，所以邀請佢執教。