利物浦第6簽就到　馬克古希答應加盟

今夏瘋狂增兵嘅利物浦又有斬獲，水晶宮英格蘭國腳中堅馬克古希已答應紅軍斟介，即將加盟，將會簽約5年至2030年，轉會費5,000萬鎊(約5.38億港元)。

利物浦早前已簽入謝利美費林邦、柏斯、科利安華迪斯、米路斯卻基斯同費迪活特文，依家傾緊個強力中鋒接替達雲紐尼斯，但估唔到馬克古希咁快傾掂，有機會「爬頭」成為今夏第6簽。

24歲嘅馬克古希同水晶宮尚餘1年約，佢表明唔會續約後今夏焗賣，立即收到多隊報價，利物浦處於領先位置，紐卡素同熱刺緊隨其後，由於馬克古希本人已同意加盟利物浦，嚟緊同水晶宮嘅談判可望於短期內展開。