維拉財困3位借將全退貨　準備賣埋女子隊

阿士東維拉為滿足英超「盈利及可持續發展條例」要求，急需要節省開支，甚至變賣家當，會方決定放棄買斷3位借將拉舒福特、馬高阿辛斯奧、阿素迪沙斯，並計劃仿傚車路士，出售女子隊整靚盤數，以符合賽會要求。

拉舒福特、馬高阿辛斯奧、阿素迪沙斯2月初加盟維拉以來，都有不俗表現，尤其是向巴黎聖日耳門借用嘅阿辛斯奧上陣21場入8球，但基於財政限制，維拉無力收購佢哋，6月30日借用期屆滿後，3人正式返回所屬球隊。

阿士東維拉節流並未夠，仲要開源，英國《電訊報》指維拉準備將女子隊10%股份出售畀美國投資者，可獲得550萬鎊，其餘90%股份賣畀母公司，意味有望籌到5,500萬鎊(約6億港元)舒緩財政壓力。

車路士之前出售女子隊畀母公司，「左手交右手」獲得2億鎊，成功規避「盈利及可持續發展條例」，維拉依家有樣學樣。