多蒙特搭上尾班車　世冠盃8強全部誕生

周三(2日)早上世冠盃16強壓軸之戰，多蒙特憑前鋒古拉斯梅開二度，以2比1擊敗蒙特雷，8強球隊全部誕生，歐洲兵團成為大贏家佔5席，另有2支巴西球隊，希拉爾成為唯一亞洲代表。

開波初段，墨西哥球隊蒙特雷試圖先發制人，中場尼臣迪奧沙遠射，被門將基哥高保接實。多蒙特企穩陣腳後，踢到14分鐘打開紀錄，透過1次美妙組織，由古拉斯射入。

呢支德甲勁旅得勢不饒人，10分鐘之後，再由古拉斯射成2比0，值得一提，2個入波都係來自卡廉艾迪耶美助攻。古拉斯之後仲有2次近門起腳，但都把握唔到，錯失上演「帽子戲法」機會。

換邊後冇耐，蒙特雷靠前鋒貝達拉美入波追至1比2，但始終收復唔到失地黯然出局，意味5支中北美洲球隊已全軍覆沒。多蒙特打入8強，將遇上2024年歐聯決賽對手皇馬，雙方近4次對賽，多蒙特都輸波，今次能否打破宿命，大家拭目以待。

綜觀8強球隊，巴黎聖日耳門、拜仁慕尼黑、皇馬、多蒙特位於同一條戰線，形成「困獸鬥」，只有1隊可以入決賽。反觀，車路士身處另一條淘汰賽戰線，似乎比較容易踢。