曼聯想平買尼迪迪　「寸王」玩嘢截胡

根據西班牙媒體《Fichajes》爆料，曼聯計劃以900萬鎊(約9,700萬港元)收購李斯特城中場尼迪迪，作為卡斯米路接班人，但前紅魔鬼主帥摩連奴亦睇中呢位28歲尼日利亞國腳，準備出手截胡。

由於李斯特城下季降落英冠，觸發尼迪迪解約金條款，其他球會可以用900萬鎊直接買斷佢。據悉曼聯主帥魯賓艾摩廉考慮到卡斯米路已經33歲，另外2位防守中場曼紐爾烏加迪、明奈剛過去球季表現令人失望，所以希望簽入1位防中，由於會方要集中資金收購前鋒，於是向「平價貨」尼迪迪埋手。

尼迪迪已效力李斯特城9季，早已適應英超比節奏，曼聯簽入佢可以「即食」，但想獲得呢位中場硬漢加盟，仲要面對摩連奴執教嘅費倫巴治競爭，因為「寸王」想簽入尼迪迪，代替可能離隊嘅費特，現時就要睇尼迪迪個人意願，到底想繼續踢英超，抑或去土耳其搵食。