沙特職再添星　拿卡錫迪加盟新升班球隊

再有球星空降沙特阿拉伯職業聯賽，新升班球隊新未來城SC(Neom SC)宣布簽入法國著名射手拿卡錫迪，雙方簽約2年，意味呢位34歲老將下季有望同昔日阿仙奴鋒線拍檔奧巴美揚交手。

拿卡錫迪3年前離開阿仙奴，重返母會里昂，近3季為呢支法甲球隊上陣116場入72球，佢早前已約滿離隊，隨即獲得新未來城SC招攬。雖然新未來城SC係新升班球隊，但財力雄厚，向拿卡錫迪提供一份2,000萬歐元(約1.85億港元)年薪合約，為期2年，並有權選擇續約多1年。

值得一提，另1位里昂球員賓華馬今年1月底被外借去新未來城SC，會方已決定買斷佢，拿卡錫迪有呢位舊隊友照應，應該可以迅速適應新環境。

拿卡錫迪去沙特搵食，可以重遇唔少老友，包括效力艾卡迪沙嘅奧巴美揚，兩年曾於阿仙奴做過4年隊友，現時殊途同歸，都去沙特掘金。