耶馬10號波衫開售大賣　單日銷售額破紀錄

兩大傳奇C朗拿度同美斯逐步淡出，17歲新星拉明耶馬就成為新世代球王，巴塞隆拿早前宣布呢位西班牙天才將改着10號波衫，周三(2日)新球衣開賣銷情非常火爆，據報單日銷售額高達210萬美元，打破晒贊助商NIKE嘅單日波衫銷售紀錄。

拉明耶馬上季着19號，隨住佢成為巴塞隆拿同西班牙國家隊「當家」，巴塞決定畀佢喺新球季改着10號，一件馬納當拿、朗拿甸奴、美斯等傳奇着過嘅號碼。雖然巴塞計劃喺7月13日、拉明耶馬18歲生日先舉行「10號加冕」儀式，但球迷似乎已經等唔切。

西班牙媒體《Relevo》報道，巴塞新球季波衫開賣首日，印住拉明耶馬嘅10號戰衣即大賣，全球銷售額達到210萬美元，打破球衣贊助商NIKE單日波衫銷售紀錄。巴塞近年受到嚴重財政問題困擾，依家有拉明耶馬呢棵搖錢樹，相信重見光明指日可待。