【祖達離世】C朗：難以置信！你啱啱先結婚

利物浦前鋒兼葡萄牙國腳迪亞高祖達，因車禍離世消息傳出後，令人震驚，各方紛紛哀悼，葡萄牙國家隊隊友基斯坦奴朗拿度發文哀悼：「難以置信！我哋啱啱先至一齊喺國家隊努力，你啱啱先結婚...」C朗向祖達家人、妻子及孩子們致以深切慰問，並祝福佢哋永遠堅強：「我知道你會永遠和他們在一起。安息吧，迪亞高和安德烈。我們都會想念你們。」

葡萄牙足總發文：「祖達唔單止係一名出色球員，亦係非凡的人，贏得身邊隊友同對手尊重，佢總能為人帶來歡樂，我們失去兩名好球員（連同其弟弟安德烈），係球壇重大損失。」葡國名宿富達亦發文：「聽到呢個消息，令我非常心痛，實在難以置信，藉此向佢家人同朋友致以深切哀悼，足球界同葡萄牙都沉浸在悲傷之中，願你安息吧，冠軍。」葡萄牙足總已向歐洲足協申請，在周五（4日）凌晨女子歐國盃西班牙女足對葡萄牙女足，賽前為祖達兄弟進行默哀儀式。

迪亞高祖達以拚搏見稱，職業生涯效力過多支球隊，包括馬德里體育會、波圖、狼隊及利物浦，其中佢喺2020年加盟紅軍後，5年來一共上陣182次，攻入65球，贏過英超、英足盃、英聯盃冠軍，並在2022年殺入歐聯決賽，可惜屈居亞軍。除此之外，迪亞高祖達自2019年開始入選葡萄牙國家隊，49次披甲攻入14球，並協助葡軍兩奪歐國聯冠軍。

馬德里體育會、波圖及狼隊均有發文悼念呢位葡萄牙天才前鋒。