艾利洛人氣急升　利物浦加價至5,000萬鎊

英格蘭U21喺歐國盃成功衞冕，成屆賽事入5球兼做MVP嘅哈維艾利洛成為「當紅炸子雞」，據報白禮頓、阿士東維拉、富咸同RB萊比鍚正進行爭奪戰，而利物浦知道艾利洛有價有市，決定將叫價提高到5,000萬鎊！

22歲嘅艾利洛上季喺利物浦未受重用，上季英超只踢過2次正選，佢早前公開表示「唔想再浪費時間」，隨住利物浦用天價收購科利安華迪斯，艾利洛離隊係勢在必行。白禮頓早已出手搶人，但隨住U21歐國盃嘅光芒四射，追求者同身價都水漲船高。

據《The Athletic》報道，利物浦以另外兩位U21球員轉會作為參考，查洛爾昆沙早前以3,500萬鎊轉投利華古遜、祖比比寧咸亦以3,200萬鎊加盟多蒙特，以艾利洛近期嘅風頭，利物浦決定為佢標價5,000萬鎊，如果買方同意利物浦加入「回購條款」，就可以減至4,000萬鎊，真係皇帝女唔憂嫁。