迪亞高祖達喪禮今舉行　利物浦封存20號波衫

葡萄牙球星迪亞高祖達周四(3日)因嚴重車禍離世，消息令全球震驚。據葡萄牙媒體報道，祖達同佢細佬喺慘劇發生前，正要趕船返英國開操，事發地點係西班牙著名「交通黑點」。消息指祖達喪禮今日(周五)會喺佢家鄉舉行，利物浦亦宣布會永久封存佢件20號波衫悼念。

今次慘劇發生喺凌晨時份，據報祖迪當時同弟弟安德烈當時揸林寶堅尼跑車，去西班牙北部城市桑坦德，準備坐船返英國南部為下周開操準備。祖達選擇坐船而唔係坐飛機，係因為佢冇幾耐前做肺部手術，醫生認為暫時唔適合坐飛機。祖達喺上季結束後，同樣係坐船由英國返葡萄牙進行婚禮。

西班牙警方調查後透露，救援人員到場後祖達兄弟已經身亡，未知當時邊個駕駛，初步估計係喺A-52公路超車嗰陣爆胎失控，車輛被火燄吞沒，案發現場見到架林寶堅尼已被燒至面目全非。報道指事發嘅A-52公路最高時速可達120公里，被稱為「最危險公路」，2023年發生過19宗交通意外，平均每宗意外有1.5人喪命。

噩耗公布後，大批球迷去到晏菲路球場獻花悼念，喪禮會喺祖達家鄉波爾圖舉行，當地時間周五下午3時開始，周六(5日)朝早10點舉行安息彌撒。利物浦亦宣布，祖達過去5年效力利物浦所着嘅20號波衫，將會被永久封存，以紀念佢對利物浦嘅重大貢獻。