安迪歷攤牌要求離隊　行「大細哨」舊路？

皇馬鋒線醞釀大地震，繼洛迪高高斯之後，另1位巴西射手安迪歷亦準備走人，根據西班牙《科貝電台》爆料，呢位18歲新星近日同「銀河艦隊」行政總裁荷西山齊士見面，討論今夏離隊可能性，盛傳AC米蘭有興趣簽入呢位「新大哨」。

安迪歷2023年11月晉身國家隊，成為自1994年朗拿度之後，最年輕巴西大國腳，因而有「新大哨」之稱。不過，呢位天才射手上年夏天正式加盟皇馬以來，被投閒置散，上季僅上陣847分鐘，射入7球及1次助攻，早已傳出佢有意離隊。

安迪歷因為季尾受傷，日前先至去美國同皇馬會合，錯過世冠盃分組賽，據悉佢歸隊主要目的係同球會管理層傾轉會問題。

皇馬方面考慮到「土炮」射手干沙路加西亞喺今屆世冠盃有神勇表現，唔排除出售安迪歷，意甲老牌球會AC米蘭正在積極增兵提升實力，有意簽入安迪歷，估計佢身價為3,500萬歐元(約3.2億港元)。

值得一提，巴西「大細哨」朗拿度、朗拿甸奴都曾效力A米，安迪歷有機會追隨2位前輩步伐。