前曼聯型男加盟阿仙奴　幫阿迪達打江山

阿仙奴教練團近期出現變動，29歲「天才助教」古斯達轉任帕爾馬主帥，不過阿迪達好快就搵到新幫手，前曼聯、皇家馬德里型男球星軒斯，落實即時加入阿仙奴教練團，呢位47歲阿根廷名將係阿迪達「啟蒙老師」，依家終於喺英超拍住上。

據《The Athletic》報道，球員時代為曼聯贏過英超冠軍(2007)、幫皇馬拎過西甲冠軍(2008)嘅軒斯，正式加入阿仙奴教練團，取代古斯達嘅空缺。球員時代踢後衞嘅軒斯，退休後曾執教小阿根廷人、沙士菲、阿特蘭大聯、紐維爾舊生等球隊，上年已經傳出會投效阿仙奴，估唔到等足1年終於成事。

軒斯同阿迪達嘅淵源，要追溯到01/02球季，當年佢哋喺巴黎聖日耳門做隊友，同隊仲有另一阿根廷名宿普捷天奴。阿迪達曾表示：「軒斯同普捷天奴對我有好大啟發，佢哋一直陪住我、喺背後支持我，引導我行正確嘅職業道路，啟發我對足球比賽有更深認識。」