湯馬士梅拿談去向：想拍美斯、去曼聯唔會快樂

德國傳奇前鋒湯馬士梅拿同拜仁慕尼黑約滿，踢完世冠盃後就會正式離隊，結束17年拜仁生涯。35歲嘅梅拿目前未有退休打算，對於未來去向，呢位前鋒就承認渴望同美斯做隊友，但就表明唔考慮加盟英超球會曼聯。

梅拿喺今屆世冠盃4場都有上陣，並拎到2個入波，證明佢仍然寶刀未老。過去幾年經常傳出曼聯想簽梅拿，被問到會唔會考慮加盟曼聯，梅拿就話：「我考慮過好多次啦！依家去？不了！我唔係佢哋合適嘅人選，曼聯亦唔適合我，佢哋簽我唔會開心，我去曼聯亦唔會快樂，唔係一個好嘅組合。」

盛傳美職將係梅拿熱門嘅「下一站」，梅拿亦唔避忌向國際邁亞密大送秋波：「整體嚟講，我一定唔會抗拒同美斯做隊友嘅建議，不過我依家同國際邁亞密並冇任何直接嘅接觸。」德國《圖片報》報道，美職球會FC辛辛那提同FC洛杉磯都有意向梅拿開出聘約。