33歲古天奴被母會嫌棄　遭維拉解約

近兩年先後外借到卡塔爾同巴甲嘅菲臘比古天奴，最近被其母會華斯高嫌棄退回，阿士東維拉決定止蝕，同佢提前1年解約，古仔下一站去向未明。

古天奴在維拉周薪高達12.5萬鎊，表現急速下滑，成為球隊一大負累，近兩年均被外借，先到卡塔爾球隊艾杜哈尼落班，去年重返母會華斯高，但都未能交出好表現，今季上陣26場攻入5球，當中3球係12碼。

古天奴2018年由利物浦轉投巴塞隆拿，轉會費高達1.35億歐元，但現時身價跌至僅淨450萬歐元，比高峰期暴跌30倍，華斯高已決定放棄續借，而維拉亦無意收回之下，雙方提前解約，古天奴今夏回復自由身，不過想要搵班落絕唔容易。