「英超色魔案」疑犯身份曝光　柏迪遭起訴5項強姦及1項性侵罪

3年前「英超色魔案」疑犯真正身份終於曝光，英國執法部門正式落案起訴前阿仙奴中場湯馬士柏迪5項強姦及1項性侵罪，呢位32歲加納國腳將於8月5日上庭受審，佢已否認所有控罪，並揚言法庭將會還佢清白。

英國傳媒2022年7月曾經報道，有1位英超球員捲入強姦案，被執法部門拘捕，由於當時只係協助調查，基於法律規定，唔可以公開涉案人士姓名。當局經過3年調查後，已搜集足夠證據，現時正式落案起訴湯馬士柏迪，佢嘅疑犯身份亦曝光。

案情指湯馬士柏迪2021至22年分別強姦及性侵3名女子，總共被控5項強姦及1項性侵罪，當中2項強姦罪名涉及侵犯「A小姐」，3項強姦罪名涉及侵犯「B小姐」，仲有1項性侵罪涉及第3位女受害人。

湯馬士柏迪剛於6月30日約滿離開阿仙奴，呢支英超勁旅發表聲明同佢劃清界線，輕輕帶過話：「有關球員已於6月30日約滿離隊，案件已進入法律程序，球會唔可以發表評論。」輿論批評兵工廠一早知道湯馬士柏迪涉案，但近3年仍然繼續派佢上陣比賽。

湯馬士柏迪將於8月5日上庭受審，佢透過代表律師發出聲明話：「我近3年一直配合當局調查，歡迎有關方面現時給予我證明清白嘅機會。」柏迪2020年夏天以4,500萬鎊(約4.8億港元)轉會費，由馬德里體育會加盟阿仙奴，總共上陣167場入9球，兵工廠原本打算同佢續約，但最終談判失敗，已恢復自由身，可以加盟其他球隊，但柏迪疑犯身份曝光後，相信難有球會簽佢。