【有片】補時3入波1紅牌 麥巴比倒掛射爆多蒙特
周日(6日)凌晨世冠盃8強，皇家馬德里同多蒙特上演峰迴路轉之戰，最後補時階段竟然出現3個入波同1張紅牌，包括基利安麥巴比嘅驚天倒掛金鈎入波，最終皇馬3比2力壓多蒙特晉級，4強將會同巴黎聖日耳門爭逐決賽席位。
皇馬今場繼續將大病初愈嘅麥巴比放喺後備，不過新人前鋒干沙路加西亞不負所託，10分鐘就近門射入先開紀錄，20分鐘法蘭加西亞接應阿歷山大阿諾特傳中射成2比0。多蒙特之後力圖反撲，但去到補時先至掀起高潮。
多蒙特前鋒麥斯比亞補時2分鐘勁射追番1粒，但2分鐘後輪到後備上陣嘅麥巴比表現，佢接應艾達古拿傳中施展倒掛抽入，將優勢再增加到2球，點知2分鐘甸恩胡積臣禁區內拉跌單刀嘅古拉斯，被趕出場兼輸12碼，古拉斯親自操刀射入，但皇馬仍然贏3比2晉級。
麥巴比今場入波之後，用手做出「20」手勢向日前去世嘅迪亞高祖達致敬，佢賽後亦喺社交網自貼「倒掛」靚相，留言話：「呢球係好好嘅方式，去證明我感覺愈嚟愈好。紐約球場嘅氣氛好神奇，球隊又拎到一場重要勝仗，4強再見！」皇馬喺4強會對PSG，麥巴比倒戈勢成比賽焦點。