湯馬士梅拿告別延遲？傳拜仁開短約留人救亡

拜仁慕尼黑喺世冠盃出局，已經完約嘅湯馬士梅拿亦完成「最後一戰」，將告別17年拜仁生涯。不過隨住穆斯亞拿重傷，名宿馬圖斯就呼籲拜仁要挽留梅拿救亡，傳聞可能向佢開出半年嘅短期合約。

今仗重傷離場嘅穆斯亞拿，養傷期預計4至5個月，留用35歲老將梅拿救亡係辦法之一，名宿馬圖斯表示：「穆斯亞拿嘅傷令人震驚，呢個情況下，拜仁應該考慮畀梅拿一張半年合約。美職球季到時先開始(2月份)，唔影響佢去美職發展，而呢段時間就對拜仁有好大幫助，我當年去美國，拜仁都有類似嘅做法。」

傳聞梅拿好大機會去美職落班，但呢位老將賽後就拒絕談論去向問題：「呢場係我最後一次代表拜仁，嚟緊幾日我會睇下腦入面有咩念頭，呢一刻我唔想公開自己最深層嘅諗法，因為我哋啱啱先輸咗一場好重要嘅比賽。」