迪比利「打機」致敬祖達　一項數據預示奪金球獎？

世冠盃8強巴黎聖日耳門(PSG)以2比0擊敗拜仁慕尼黑，奧士文尼迪比利補時入波後，仿傚迪亞高祖達做出「打機」慶祝動作，向呢位日前不幸遇車禍逝世嘅利物浦前鋒致敬。迪比利踏入2025年後，表現如有神助，為PSG創造34個入波，包括射入26球及8次助攻，成為今年歐洲5大聯賽創造最多入波嘅球員，好大機會奪得今屆金球獎。

奧士文尼迪比利因傷錯過世冠盃分組賽，直至16強後備上陣復出，今仗同樣擔任後備，等到71分鐘入替巴特利巴高拿。當時比數仲係0比0，奧士文尼迪比利上陣後冇耐，PSG就由迪斯亞杜伊入波打開紀錄。戰至補時6分鐘，迪比利射成2比0，為踢少2人嘅PSG奠定勝局，呢位28歲翼鋒發揮關鍵作用。

奧士文尼迪比利唔只好波，並且一洗過往「壞孩子」形象，懂得人情世故，入波後做出「打機」動作，向迪亞高祖達致敬，PSG隊內有域天拿等4位葡萄牙國腳，迪比利此舉可以安慰呢班隊友。

奧士文尼迪比利屬於PSG成為今季「三冠王」嘅大功臣，如果能夠捧埋世冠盃，相信金球獎非佢莫屬。