中國新帥大玩年輕化　19歲新星勢獲重用

中國衝擊世盃決賽周失敗後，主帥艾雲高域上月底離任，並由久爾傑維奇出任暫代教練，呢位曾教中國奧運隊、U20嘅主帥志切將國足年輕化，多位U20舊部都獲提拔，其中啱啱19歲生日嘅劉誠宇最受期待，久爾傑維奇送畀佢嘅生日祝福就係「入多啲波」。

年紀輕輕就成為FC上海主力，劉誠宇上月為國足首次上陣，今次佢同「U20鐵三角」蒯紀聞、王鈺棟齊齊入選，據報國足抵達南韓後，劉誠宇、蒯紀聞、王鈺棟都被編入主力隊當中，消息指久爾傑維奇會改踢4-2-3-1陣式，所以可能會更加重用佢曾經教過嘅球員，減少磨合同適應嘅時間。

劉誠宇嘅「成名作」，就係上年代表中國U19踢一個四角賽，佢喺決賽對南韓U19狂奔半場入波，帶領中國U19贏2比0捧盃，喺國家隊備受期待。劉誠宇上星期19歲生日，隊友特別幫佢慶祝兼唱生日歌，久爾傑維奇亦祝福佢：「年輕球員入國家隊過生日，大家都羨慕佢，劉誠宇要用入波報答。祝佢生涯順利、入多啲波，將來繼續喺國家隊慶祝生日。」