利物浦推遲開操日期　首場季前熱身面臨取消

葡萄牙球星迪亞高祖達上周四(3日)因車禍離世，利物浦為令全體職、球員有更多時間平伏哀痛心情，決定將開操日推遲到周二(8日)，首場季前熱身賽作客普雷斯頓亦面臨取消，賽事門票已經停止售賣。

利物浦原本開操計劃，係部份唔使踢國際賽球員喺上周五(4日)歸隊，其餘球員就喺周一(7日)報到，包括新兵科利安華迪斯、謝利美費林邦等等，但隨住祖達兄弟嘅不幸離世，計劃亦出現變卦。

由於大部份球員日前出席完祖達喪禮，領隊施洛決定畀佢哋更多時間平伏，開操日推遲到周二，而原定周日(13日)作客普雷斯頓嘅首場季前熱身亦面臨取消，要等球員返嚟之後，評估佢哋情緒再作決定。

利物浦官網嘅賣飛系統，已宣布暫停出售賽事門票，英冠球會普雷斯頓亦會尊重「紅軍」嘅意願。英國傳媒指如果利物浦決定如期進行比賽，普雷斯頓已安排一系列悼念儀式。

按利物浦嘅季前備戰安排，對普雷斯頓之後，大軍將會進行亞洲之旅，首站就係喺香港啟德對戰AC米蘭，之後就飛去日本對橫濱水手，8月初會喺社區盾對水晶宮