【官宣】蘇比文迪加盟阿仙奴　下個到約基利斯

阿仙奴近期轉會行動積極，周日(6日)官方宣布西班牙中場蘇比文迪加盟，雙方簽約5年，轉會費為5,580萬鎊；「兵工廠」仲未停手，據報球會已同士砵亭前鋒約基利斯達成轉會協議，將以7,000萬鎊收購呢位瑞典前鋒，相當豪氣。

西班牙中場蘇比文迪幾個月前已傾掂轉會阿仙奴，不過皇家蘇斯達因「會計原因」要求7月先至拍板，26歲嘅蘇比文迪將會着36號，佢簽約後表示：「呢個係我生涯重要時刻，踏入阿仙奴我先明顯呢間球會有幾宏偉，阿仙奴嘅風格同我非常配合，而且好有潛力，最好嘅日子仍喺面前。」

繼阿列沙巴拿加同蘇比文迪後，下一個新兵好可能係瑞典前鋒約基利斯。包括權威記者羅曼諾等媒體報道，阿仙奴同士砵亭嘅斟介有突破性進展，轉會費有望喺7,000萬鎊左右成交，羅曼諾透露：「經過新一輪談判，阿仙奴好接近簽入約基利斯，約基利斯只會選擇阿仙奴，甚至願意放棄士砵亭要畀佢嘅200萬鎊人工去促成交易。」