安東尼表明唔想返曼聯　願減薪去貝迪斯

曼聯已開操，不過多位打算離隊球員獲准延遲歸隊，當中包括安東尼馬菲奧斯，據報安東尼已表明唔想返曼聯，願意減薪轉投貝迪斯，期望曼聯放人。

西班牙傳媒報道，安東尼上季中外借到貝迪斯，足球生涯獲得重生，早前更重返國家隊，借用期滿後，按照合約安東尼必須返回曼聯報到，但安東尼已表明唔想返去，希望正式轉投貝迪斯。

安東尼在曼聯周薪據報超過20萬鎊(約214萬港元)，外借貝迪斯半年期間，雖然曼聯承擔部份人工，但貝迪斯仍要支付周薪約14萬鎊，成為貝迪斯全隊最高薪球員，以貝迪斯財政狀況，不可能承擔安東尼全部人工，但如果安東尼願意大幅降薪，咁就有得傾。

不過貝迪斯高層亦公開承認，簽入安東尼問題複雜，原因係曼聯當初買入安東尼花費1億歐元天價，曼聯唔希望以太低價格出售，貝迪斯方面曾提出不同方案，包括購入安東尼一半擁有權，讓曼聯保留日後高價出售球員權利，當中牽涉問題不易解決。