紐卡素終於出手　6,000萬鎊收購艾蘭加

英超勁旅紐卡素今個夏天沉靜多時，一出手就嚇親人，據報佢哋已同諾定咸森林達成協議，用總值6,000萬鎊轉會費收購瑞典翼鋒安東尼艾蘭加，預計周三(9日)就會進行體測，完成後會簽署5年合約。

紐卡素對艾蘭加心儀已久，上年曾出價4,500萬鎊收購被拒，今夏捲土重來出手更重。據《The Athletic》報道，紐卡素會先畀5,200萬鎊，另加約800萬鎊較難實現嘅獎金條款，而艾蘭加前球會曼聯，亦可得到轉會費6%至12%嘅「二次轉會分帳」，皆大歡喜。

現年23歲嘅艾蘭加，上季喺38場英超上陣，交出6個入波同11次助攻，係森林拎到歐洲賽資格嘅重要原因。艾蘭加轉會紐卡素後，將會同瑞典國家隊拍檔阿歷山大伊沙克再度合作。