烏加特公開新戀情　女友係麥巴比舊愛！

曼聯即將展開新球季備戰，烏拉圭中場曼紐爾烏加迪近日就春風滿面，周日(7日)更喺個人IG宣布戀情，女方係英國網紅喬治亞(Georgia May Heath)，亦係昔日巴黎聖日耳門(PSG)隊友基利安麥巴比嘅舊愛，即時成為球迷熱話。

喺英國同澳洲生活嘅喬治亞，早喺2021年就被傳同麥巴比拍拖，上年初亦被影到一齊去摩洛哥旅行。不過今年4月，網民發現喬治亞Po過一張性感睡衣相片，背景同烏加迪住嘅豪宅一模一樣，傳出兩人已經撻着。烏加迪周日終於公開戀情，喺IG貼出兩人喺遊艇合照，Tag埋女方個名之餘仲加上心心emoji，盡情放閃。

雖然烏加迪搭上麥巴比舊愛，不過3人之間似乎冇任何芥蒂，事關麥巴比都有Like到烏加迪張「放閃相」。喬治亞係時裝、美妝網紅，IG有接近23萬粉絲，相信佢同烏加特嘅戀情曝光後，人氣會再度提升。